|
Монгол улс уул уурхайн салбараас хэт хараат. Гэсэн хирнээ өнөө хэр энэ салбарынхаа засаглалыг тодорхой болгож чадаагүй. Тодруулбал улс төр дагасан мөчлөгөөс болж төрийн бодлого өөрчлөгдөж сонгууль дагасан халамжийн тогтолцоо бэлэн мөнгө тараалт зэрэг нь баялгийн засаглал хөгжиж чадаагүй гэж судлаачид тодорхойлж байна. Монгол Улсын Ерөнхийлөгчийн Тамгын газар, “Хөгжил ардчилал” ТББ болон Конрад-Аденауэр сан хамтран “Баялгийн засаглал” хэлэлцүүлгийг зохион байгууллаа. Монгол улс сүүлийн 27 жилд баялгийн засаглалаа хөгжүүлж чадаагүй гэж хэлэлцүүлэгт оролцогчдын илтгэлд дурдагдлаа. Тухайлбал дэлхийд уул уурхайн баялаг ихтэй 87 улсаас баялгийн засаглалын индексээрээ монгол улс дундаж үзүүлэлттэй байгаа юм байна. Үүний хамгийн том шалтгаан нь улс төр. Тодруулбал уул уурхайд баримтлах бодлого нь улс төр, сонгуулийн мөчлөг дагаж өөрчлөгдөг гэж судлаачид онцоллоо. Үүнээс болж иргэд, уул уурхайн салбарынхан, улс төрийн шийдвэр гаргагчид гэсэн хамгийн гол гурван төвшний ойлголцол, зөвшилцөл өнөө хэр бий болоогүй. Бодлогын тодорхойгүй байдал энэ салбарын хөгжилд, баялгийн засаглалд тулгамдаж байгаа асуудлаар нэрлэгдэж байна. ПЕТЕР ХЕФЕЛЕ “КОНРАД АДЕНАУЭР САН”-ИЙН БҮС ХАРИУЦСАН ТӨСЛИЙН ЗАХИРАЛ: Монгол Улсын хувьд сүүлийн жилүүдэд алдаа оноо аль аль нь байсан. Дотоодын улс тѳрѳѳс гадна дэлхийн зах зээл дээр түүхий эдийн үнэ унасан нь үүнд бас нөлөөлнө. Цаашид Монгол Улс эрдэс баялгийн салбарын орлогоо сан хуримтлуулах нь зѳв байх. Энэ бол бусад улсуудын туршлага. Ѳѳрѳѳр хэлбэл хямрал нүүрлэсэн цагт хуримтлалаа ашигладаг байх явдал юм. Монгол Улс олон улсын хѳрѳнгѳ оруулагчдын итгэлийн хэзээ нэгэн цагт татах нь мэдээж. Гэвч геополитикийн нѳхцѳл байдлыг харвал хѳрѳнгѳ оруулагчдад бас тийм ч таатай бус байдаг. Тийм ч учраас Европын Холбоотой Монгол Улс энэ талаар түлхүү зѳвлѳлдѳх нь зѳв байх. Монгол улсын эдийн засаг уул уурхайгаасаа шууд хамааралтай. Бага эдийн засгийн нэг салбараас хэт хараат байлгах нь эрсдэлтэй. Тиймээс эдийн засгийг солонгоруулах арга хэлбэрээ улс төрийн мөчлөгөөс үл хамаарч авч хэрэгжүүлэх ёстой гэдгийг хэлэлцүүлэгт оролцогчид онцолж байлаа. Эх сурвалж: MONGOLTV.NEWS |
È
24news.mn