Японы Боловсрол, соёл, спорт, шинжлэх ухаан, технологийн яам болон АНУ-ын Агаарын нислэг, сансрын уудмыг шинжлэн судлах үндэсний төвийн /NASA/ төлөөлөгчид сарыг эзэмших хөтөлбөрийг хэрэгжүүлэхэд хамтран ажиллах тунхаг бичигт гарын үсэг зурлаа.
Японы Засгийн газар NASA агентлагийн сарыг эзэмших хөтөлбөрт нэгдэх шийдвэрээ 2019 оны 10 дугаар сарын 18-нд мэдэгдсэн юм. “Nikkei” сонинд мэдээлж буйгаар, Японы тал сарны тойрог замд “Gateway”станц байгуулахад оролцох аж.
NASA сарыг эзэмших шинэ хөтөлбөрөө өнгөрсөн хавар “Artemis” гэж нэрлэсэн юм. Уг хөтөлбөрийг гурван үе шаттай хэрэгжүүлнэ. Эхний үе шатанд “Space Launch System” хүнд пуужинд суурилуулсан “Orion” хөлөг сарыг тойрон автомат нислэг хийснийхээ дараа дэлхий рүү буцаж ирэх бөгөөд энэ үе шатыг 2020 оны хоёрдугаар хагаст хэрэгжүүлэхээр товложээ. 2022 онд товлосон хоёр дахь үе шатанд манай гарагийн дагуул руу сансрын нисэгчид жолоодлогот хөлгөөр нисэх бол 2024 онд гурав дахь үе шатанд NASA сансрын нисэгчдийг саран дээр буулгахаар төлөвлөжээ.
Сарыг эзэмших АНУ-ын “Artemis” хөтөлбөрт дэлхийн 26 улс оролцох хүсэлтээ илэрхийлж, энэ сэдвээр NASA-гийн зохион байгуулсан олон талт уулзалтад оролцжээ.
24news.mn